अमरावती : तो तिच्यावर एकतर्फी प्रेम करीत होता. ती त्याला नेहमी टाळायची. त्याने सहा महिन्यांपूर्वी तिला चक्क लग्नाची ऑफर दिली. मात्र, तिने ती धुडकावली. यानंतरही तो सुधरला नाही. एके दिवशी पाठलाग करून तिला अडविले. यावेळी चिडलेल्या युवतीने त्या युवकाच्या श्रीमुखात लगावून आपली सुटका करून घेतली. 

भातकुली तालुक्‍यात ही घटना घडली. भातकुली पोलिसांनी याप्रकरणी अंकेश ऊर्फ गोलू दिनेश पिवतकर (वय 21) विरुद्ध विनयभंग, जिवे मारण्याची धमकी दिल्याप्रकरणी गुन्हा दाखल केला. युवती ओळखीची असल्यामुळे त्याने कशाचाही विचार न करता तिला एकटी असताना रस्त्यात थांबवून, थेट लग्नाची मागणी घातली. तिने स्पष्ट शब्दात नकार कळवून त्याच्यापासून स्वतःला दूरच ठेवले. परंतु अंकेश हा तिच्या एकतर्फी प्रेमात वेडा झाला. 

हेही वाचा : माकड दोन दिवस होते विहिरीत पडून; शेतकऱ्याने घातले खाऊपिऊ... वाचा पुढे

सहा महिन्यांनंतर हरतोटी ते बोरखडी मार्गावर सदर युवती आपल्या बहिणीसह जात असताना, अंकेशने दुचाकीवरून तिचा पाठलाग करून अडविले. बळजबरीचा प्रयत्न केला असता पीडितेच्या मोठ्या बहिणीने तिला अंकेशपासून सोडविले. मात्र, त्याने तिच्या बहिणीसोबतसुद्धा असभ्य वर्तन करण्याचा प्रयत्न केला. दोघींनी त्याच्या तावडीतून सुटताच एकीने त्याच्या श्रीमुखात लगावून त्याला धडा शिकविला. पीडितेने भातकुली ठाण्यात तक्रार केली. या प्रकरणी पोलिसांनी अंकेशविरुद्ध गुन्हा नोंदविला.